साँगु, ताप्लेजुङ | २०८३ वैशाख ३०

मैवाखोला गाउँपालिकाद्वारा 'जनताको सरकार, जनताकै घरदैलोमा' भन्ने मूल नाराका साथ सञ्चालित एकीकृत घुम्ती सेवा शिविर तथा सार्वजनिक सुनुवाई कार्यक्रम सफलतापूर्वक सम्पन्न भएको छ। गत २०८३ वैशाख २१ गतेदेखि सुरु भएको यो अभियान आज वैशाख ३० गते गाउँपालिकाको केन्द्र साँगुमा आएर समापन भएको हो।गाउँपालिकाको भौगोलिक विकटतालाई मध्यनजर गर्दै नागरिकहरूलाई पालिकाको केन्द्रसम्म धाउनुपर्ने बाध्यताको अन्त्य गर्न र स्थानीय सरकारको सेवालाई सुलभ बनाउन यो अभियान सञ्चालन गरिएको थियो। ६ दिनसम्म सञ्चालित यस अभियान अन्तर्गत गाउँपालिकाका सबै ६ वटै वडाहरूमा पुगेर सेवा प्रवाह र नागरिक संवाद गरिएको छ।

शिविरका मुख्य उपलब्धिहरू:
१. एकीकृत सेवा प्रवाह: शिविरमार्फत पालिकाद्वारा प्रवाह गरिने विभिन्न प्रशासनिक सेवाहरू, योजना सम्झौता, प्राविधिक परामर्श तथा सिफारिस सम्बन्धी कार्यहरू नागरिकको आफ्नै पायक पर्ने स्थानबाट उपलब्ध गराइयो। यसले गर्दा स्थानीयवासीको समय र खर्चको ठूलो बचत भएको छ।
२. सार्वजनिक सुनुवाई र सुशासन: प्रत्येक वडामा नेपाल पत्रकार महासंघ, ताप्लेजुङ शाखाको सहजीकरणमा सार्वजनिक सुनुवाई कार्यक्रम आयोजना गरियो। कार्यक्रममा नागरिकहरूले स्थानीय सरकारको कामकारबाही, विकास निर्माण र बजेट कार्यान्वयनका विषयमा प्रत्यक्ष रूपमा आफ्ना गुनासो, जिज्ञासा र रचनात्मक सुझावहरू राखेका थिए।
३. पारदर्शिता र उत्तरदायित्व: सार्वजनिक सुनुवाईमा उठेका प्रश्नहरूको जनप्रतिनिधि तथा कर्मचारीहरूबाट तत्कालै स्पष्टीकरण तथा सम्बोधन गरिएको थियो, जसले स्थानीय सरकारलाई नागरिकप्रति थप उत्तरदायी बनाएको छ।

गाउँपालिकाको प्रतिबद्धता:
अभियान समापनका अवसरमा गाउँपालिकाले सबै ६ वटै वडाका नागरिकहरूबाट प्राप्त भएका अमूल्य सुझाव, गुनासो र पृष्ठपोषणहरूलाई संकलन गरी आगामी नीति, कार्यक्रम तथा बजेट निर्माणमा उच्च प्राथमिकताका साथ समावेश गर्ने प्रतिबद्धता व्यक्त गरेको छ। नागरिकका आवाज सुन्ने र सोही बमोजिम पद्धतिमा सुधार गर्दै सुशासन कायम राख्न गाउँपालिका निरन्तर क्रियाशील रहनेछ।

यो बृहत् अभियानलाई सफलतापूर्वक सम्पन्न गर्न अहोरात्र खटिनुहुने जनप्रतिनिधिहरू, कर्मचारीहरू, सहजीकरण गर्ने नेपाल पत्रकार महासंघ ताप्लेजुङ शाखा, विद्यालय परिवार तथा उत्साहजनक रूपमा सहभागी भई सुझाव दिनुहुने सम्पूर्ण आदरणीय गाउँवासी दाजुभाइ तथा दिदीबहिनीहरूमा मैवाखोला गाउँपालिका हार्दिक आभार तथा धन्यवाद व्यक्त गर्दछ।