मैवाखोलामा कफी खेती विस्तार गरिँदै, गाउँपालिकाद्वारा किसानलाई बिरुवा वितरण
ताप्लेजुङको मैवाखोला गाउँपालिकाले कफी खेती विस्तार गर्ने लक्ष्यसाथ तल्लो भेगका किसानलाई कफीको बिरुवा वितरण । गाउँपालिकाले किसानहरूको आयआर्जनमा वृद्धि गर्ने उद्देश्यले प्रत्येक घरलाई न्यूनतम १ सय वटा कफीको बिरुवा प्रदान गर्दै कार्यक्रम अघि बढाएको हो ।
कार्यक्रमको सुरुवात वडा नं. १ र २ का किसानहरुलाई बिरुवा वितरण गर्दै गरिएको हो । किसानलाई विरुवा वितरण गर्दै गाउँपालिका अध्यक्ष विजयप्रकाश वनेमले किसान दाजुभाइ तथा दिदीबहिनीहरूलाई कफी खेती गर्दा अनिवार्य रूपमा जैविक मल र जैविक विषादी मात्र प्रयोग गर्न आग्रह गर्नुभयो । गाउँपालिकाका अन्य वडाका तल्लो क्षेत्रका किसानहरुलाई समेत क्रमशः बिरुवा वितरण गरिने ।
यसअघि मैवाखोला गाउँपालिकाको अनुरोधमा चिया तथा कफी विकास बोर्ड अन्तर्गतको चिया विस्तार योजना, लालीखर्क पाँचथरद्वारा सो क्षेत्रमा सम्भाव्यता अध्ययन गरिएको थियो । उक्त अध्ययनले पालिकाका सबै ६ वटै वडा कफी खेतीका लागि उपयुक्त रहेको निष्कर्ष निकालेको थियो ।
अध्ययन प्रतिवेदन अनुसार वडा नं. १ को तेल्लाबुङ, वडा नं. २ को तेम्बे टोल, हात्ती खावा (बाटोमुनि हाङ्थाना तल्लो भाग), वडा नं. ३ को माङ्हिम टोल र भट्टराई टोल, वडा नं. ४ को घिमिरे टोल (रिफाइले जाने बाटोमुनिको क्षेत्र), वडा नं. ५ को नुमलोक फाकुम्बा र घोडेटार, तथा वडा नं. ६ को हाङ्फाबुङ र साङलुपा क्षेत्र कफी खेतीका लागि उपयुक्त स्थानको रूपमा पहिचान गरिएको थियो ।
मैवाखोला गाउँपालिकामा कफी खेतीका लागि आवश्यक भूगोल, माटो, हावापानी लगायतका प्राकृतिक विशेषता अनुकूल रहेकोले आगामी दिनमा कफी उत्पादनसँगै प्रशोधन र बजारिकरणतर्फ समेत ध्यान दिने योजना बनाईएको छ ।